पोखरामा यसै महिना रेस्लिङ हुने

Avatar
admin

२०७७ चैत्र ४ गते, बुधबार १९:२४ मा प्रकाशित

प्रतियोगितामा रेस्लर नुवाकोटे टाइगर, थागु, द यूव, डेभिड, साइन, टुप्पी ग्याङ, एक्स हिरो, सोफी, दिलाशा, चट्टान, लेडी एञ्जल, किङ रोवर्ट, तन्नु, सिजे, यूविएल, एससी, हुम्ली फाइटर, योगी, जोनलगाएत महिला तथा पुरुष खेलाडीले प्रतिस्पर्धा गर्नेछन् ।

चैत २० र २१ गते हुने रेस्लिङमा २२ वर्षदेखि ३८ वर्षसम्मका खेलाडीले भाग लिने नेपाल रिङ रेस्लिङ संघकी महासचिव सुवर्ण श्रेष्ठले जानकारी दिईन् । उनले कोभिडका कारण अन्तर्राष्ट्रिय खेलाडीको सहभागिता गराउन नसकिएको बताइन् ।

रेस्लिङ प्रतियोगिताका लागि १ सय र २ सय टिकट शुल्क तोकिएको छ । रिङ रेस्लिङ खेलको विकास तथा विस्तारका लागि खेलाडी उत्पादनसँगै निरन्तर तालिमको व्यवस्था गर्न रिङ रेस्लिङ एकेडेमीको स्थापना गरिने महासचिव श्रेष्ठले बताइन् । राष्ट्रिय खेलकुद परिषद् (राखेप) सदस्य राजेश गुरुङले रेस्लिङ खेलको विकासको लागि योगदान दिँदै आएको नेपाल रिङ रेस्लिङ संघलाई धन्यवाद दिए ।

त्यसैगरि गण्डकी प्रदेश खेलकुद परिषद्का नव नियुक्त सदस्य सचिव तेज गुरुङले यस्ता प्रकारका प्रतियोगिता सम्पन्न गर्न पोखरालाई रोज्नु भनेको गण्डकी प्रदेशकै गौरव विषय भएको बताए । उनले भने, ‘पोखरालाई खेलकुदको राजधानी भनिरहेकै अवस्थामा यस्ता प्रतियोगिताले अर्को इट्टा थप्नेछ ।’

प्रतियोगिताको विजेताले च्याम्पियन बेल्टसहित १ लाख र दोश्रो हुनेले ५० हजार रुपैयाँ प्राप्त गर्नेछन् । प्रतियोगितामा झन्डै २९ लाख रुपैयाँ खर्च हुने अनुमान गरिएको छ ।