एन्फा प्रवक्ताबाट राईको राजीनामा

Avatar
admin

२०७८ श्रावण १८ गते, सोमबार १९:२७ मा प्रकाशित

एन्फाका वरिष्ठ उपाध्यक्ष पंकज विक्रम नेम्बाङ र राष्ट्रिय टोलीका मुख्य प्रशिक्षक अब्दुल्ला अलमुताइरीको विवाद चर्किपछि त्यसको असर राईमा पनि परेको प्रष्ट देखिन्छ । अलमुतायरीसँग वरिष्ठ उपाध्यक्ष र दुई सञ्चारकर्मीको विवाद लम्बिदै जाँदा उत्पन्न घटना क्रमबाट राईले आफूलाई अलग राख्ने प्रयास स्वरुप राजीनामा दिएको देखिन्छ ।

पछिल्लो विवाद आफै समाधान गर्नबाट चुकेको एन्फाले छानबिनका लागि युवा तथा खेलकुद मन्त्रालयलाई अनुरोध गर्ने निर्णय गरको थियो । त्यसमा राईको सन्तुष्ट छैनन् । उनी समेत सम्मलित एन्फा केन्द्रिय कार्यसमितिको आपतकालीन बैठकले छानबिनका लागि मन्त्रालयलाई अनुरोध गर्ने निर्णय गरको थियो । तर, राईले त्यसमा फरक मत राखेका छन् । एन्फाले नै आन्तरिक रुपमा विवाद समाधान गर्नुपर्ने उनको तर्क छ । फुटबल विवादमा तेस्रो पक्षलाई प्रवेश गराउन नहुने पक्षमा आफू रहेको आइतबार आयोजित पत्रकार सम्मेलनमा राईले बताएका छन् ।

वरिष्ठ उपाध्यक्ष नेम्बाङको उपस्थितिमा राईले राजीनामा पत्र एन्फा अध्यक्ष कर्मा छिरिङ शेर्पालाई बुझाएका थिए । त्यसपछि पत्रकार सम्मेलन गर्दै राईले आफ्नो धारणा सार्वजनिक गरेका थिए । एन्फा केन्द्रिय समिति सदस्य राईले प्रवक्ताबाट मात्र राजीनमा दिएका हुन् ।
राईले प्रवक्ताको जिम्मेवारीमा रहँदै एन्फाले गरेका निर्णयको विरोध गर्न नमिल्ने भएकाले राजीनामा दिएको बताए । उनले भने,‘ एन्फामा देखिएको विवाद समाधानका लागि सक्दो मिहिनेत गर्दा पनि सफल हुन सकेनौं । विवादको विषय सामान्य भए पनि एन्फाकै कमजोरीको कारण समाधानमा हुन सकेन ।

एन्फा कम्प्लेक्समै आयोजित पत्रकार सम्मेलनमा राईले विवाद समाधानका लागि मन्त्रालयलाई जिम्मा दिनु आफूहरूको कमजोरी रहेको सुनाउँदै एन्फा चुकेकै कारण अहिलेको अवस्था सृजना भएको हो । उनले आफू एन्फा भित्र कसैको पक्ष र विपक्षमा नभई फुटबलको पक्षमा रहने पनि बताएका थिए ।

दुई सञ्चारकर्मीसँगको विवादबाट अहिले एन्फामा उग्र रुप लिएको छ । अलमुताइरीले वरिष्ठ उपाध्यक्ष नेम्बाङका कारण आफूलाई काम गर्न अप्ठेरो भएको आशयाका साथ पदबाट राजीनामा दिने घोषणा फेसबुकमार्फत गरेका थिए । त्यसमा नेम्बाङले कडा आपत्ती जनाउँदै अलमुताइरीविरुद्ध छानबिनको माग राखेका थिए । अलमुताइरीले पनि नेम्बाङ र दुई सञ्चारकर्मीविरुद्ध छानबिनको माग गरेका थिए ।

त्यति विषयमा छलफल गर्न बसेकेको एन्फा बैठकले मन्त्रालयलाई छानबिनका लागि अनुरोध गर्ने निर्णय गरेको थियो । त्यसपछि पनि एन्फामा नयाँ घटनाको श्रृखंला रोकिएको छैन । एन्फाले अर्को निर्णय नभएसम्मका लागि अलमुताइरीलाई राष्ट्रिय टोलीको प्रशिक्षणबाट रोक लगाएको छ । साफ च्याम्पियनसिपको तयारीमा रहेको टोलीलाई एन्फाले १० दिनका लागि विश्राम दिएको छ । एन्फाका सहायक महासचिव वसन्त अर्यालले पनि शनिबार पदबाट राजीनामा दिएका थिए ।