काठमाडौं । बागमती प्रदेश सरकारका नवनियुक्त ३ मन्त्रीको शपथ आजपनि नहुने भएको छ । प्रदेश प्रमुखको कार्यालयले विज्ञप्ति जारी गर्दै दिउँसो १ बजेका लागि तय भएको नवनियुक्त मन्त्रीहरुको सपथ ग्रहण कार्यक्रम तत्कालका लागि स्थगित भएको जानकारी गराएको हो ।
नेपाली कांग्रेसमा विवादका बीच मुख्यमन्त्री बहादुरसिंह लामाले बुधबार तीन मन्त्री नियुक्त गरेका थिए । जसमा गोविन्द लम्साल आन्तरिक मामिला तथा कानुन मन्त्री, गीता गुरुङ सहकारी तथा गरिबी निवारण मन्त्री र माया श्रेष्ठलाई युवा तथा खेलकुद मन्त्रीमा नियुक्त गरिएको थियो ।
प्रदेश प्रमसख कार्यालयमा प्रवक्ता देवेन्द्र सापकोटाले प्रदेश प्रमुख दीपक प्रसाद देवकोटाको स्वास्थ्य स्थितीमा समस्या आएका कारण सपथ कार्यक्रम अर्को मिति तय नभएसम्मका लागि स्थगित गरिएको जानकारी दिए । यसअघि हिजै सपथ गराउने तयारी गरिए पनि एमालेको दवावका कारण रोकिएको थियो ।
