काठमाडौं १८ भाद्र। चीनले दोस्रो विश्वयुद्धताकाको विजयको वार्षिक उत्सवको अवसरमा बुधबार राजधानी बेइजिङमा शक्ति प्रदर्शन गरेको छ । चिनियाँ राष्ट्रपति सी जिनपिङले बेइजिङको तियानमेन चोकमा आयोजित देशकै सबैभन्दा ठुलो सैन्य परेडमा विश्व अहिले ‘शान्ति वा युद्ध’को विकल्पको सामना गरिरहेको बताए ।
दोस्रो विश्वयुद्धमा जापानको पराजय भएको ८० वर्ष पूरा भएको अवसरमा आयोजना गरिएको उक्त भव्य कार्यक्रममा रुसका राष्ट्रपति भ्लादिमिर पुटिन र उत्तर कोरियाका नेता किम जोङ–उन प्रमुख पाहुना बनेका थिए ।
सैन्य शक्ति र कूटनीतिक प्रभाव प्रदर्शनका रूपमा गरिएको ७० मिनेट लामो परेडमा क्षेप्यास्त्र, ट्याङ्क, ड्रोनलगायत अत्याधुनिक हतियार प्रदर्शन गरियो। हेलीकोप्टरले विशाल ब्यानर तानेर उड्दा लडाकु विमान आकाशमा स्वरूप बनाउँदै उडे। कार्यक्रमको अन्त्यमा ८० हजार शान्ति पारा र रङ्गिन बेलुनहरू आकाशमा छोडिएको थियो ।
माओत्से तुङले लगाउने शैलीको सुटमा देखिएका राष्ट्रपति सीले खुला गाडीमा सैनिक निरीक्षण गर्दै उपस्थित ५० हजारभन्दा बढी दर्शकलाई सम्बोधन गरेका थिए । उक्त अवसरमा नेपालका प्रधानमन्त्री केपी शर्मा ओलीलगायत २० भन्दा बढी नेताहरु उपस्थित थिए । राष्ट्रपति सीकी पत्नी पेङ लियुआनले पाहुनाहरूलाई स्वागत गरेकी थिइन् । तस्बिर/सिन्ह्वा
