रुकुम फाल्गुन ३। पुष्पकमल दाहाल ‘प्रचण्ड’ले प्रतिनिधि सभा निर्वाचनमा देश जलाउने, भ्रष्टाचार र कुशासन चलाउने तथा जनपक्षीय आन्दोलनमा दमन गर्ने शक्तिलाई जनताले पराजित गर्ने बताएका छन्।
चुनबाङमा शनिबार अपराह्न आयोजित भेटघाट तथा अन्तरक्रिया कार्यक्रमलाई सम्बोधन गर्दै उनले बङ्गलादेशमा हालै सम्पन्न निर्वाचन परिणामबारे टिप्पणी गर्दै आगजनी र अस्थिरता चाहने शक्तिहरू अन्ततः पराजित हुने दाबी गरे।“बङ्गलादेशमा पनि आगो लगाइयो। चुनावमा आगो लगाउनेहरू नै जित्छन् भनिन्थ्यो, तर उनीहरू हारे। नजलाउने र स्थिरता चाहनेहरू जिते,” उनले भने, “सामाजिक सञ्जालमा ७५ लाख फलोअर्स भएका भनिएका व्यक्तिहरू तेस्रो भए। यहाँ पनि हल्लाखोरहरूको हिसाब जनताले गरेर बसेका छन्।”
उनले देशमा विगतमा भएका आगजनी र ध्वंसका घटनाहरू स्मरण गर्दै भने, “सिंहदरबार जले, संसद् भवन जले, सर्वोच्च अदालत जले। निजी सम्पत्ति जले, व्यक्तिका घर जले। अब आगो लगाउने र ध्वंस मच्चाउनेहरू हार्नेछन्। गणतन्त्र र परिवर्तन ल्याउनेहरू जित्नेछन्।”
उनले बङ्गलादेशको निर्वाचनबाट सिक्नुपर्ने आवश्यकता पनि औँल्याए।
प्रचण्डले आगजनी, कुशासन, दमन र हिंसा मच्चाउनेहरूलाई रोल्पा–रुकुमका जनताले राम्ररी बुझेको बताए। “तपाईंहरूले बुझ्नुभएको छ, अब देशभरिका जनताले पनि बुझ्नेछन्,” उनले भने।
उनले रुकुम पूर्वलाई विकासको नयाँ मोडेलका रूपमा स्थापित गर्ने प्रतिबद्धता व्यक्त गरे। “भरतपुर मोडेल तपाईंहरूले देख्नुभएकै छ। अब विकासको नयाँ मोडेल र समाजवादको नयाँ मोडेल विकास गर्नेछौँ,” उनले भने।